ԱՄՆ Հանրապետական կուսակցության անունից նախագահի թեկնածու Մարկո Ռուբիոն ընտրազանգվածների առջեւ ելույթ ունենալիս հայտարարել է, որ Ռուսաստանը կառավարում է գանգստերը։
Ռուբիոյի ելույթի թեման արտաքին քաղաքականությունն էր։ Նա Ռուսաստանին համարել է ԱՄՆ-ի 5 ամենամեծ սպառնալիքներից մեկը։ Նրա խոսքով՝ Պուտինը կազմակերպված հանցավոր խմբի անդամ է, որը վերահսկում է կառավարությունն ու մեծ տարածքներ։
«Եթե դուք Վլադիմիր Պուտինի քաղաքական հակառակորդներն եք, ձեր խմիչքի մեջ կարող են պլուտոնիում լցնել»,- ասել է քաղաքական գործիչը, հայտնում է CNN-ը։
Իր ելույթում նա կարծիք է հայտնել նաեւ այլ համաշխարհային առաջնորդների մասին։ Առանձնացնելով Կիմ Չեն Ընին՝ հանրապետական գործիչը նշել է, որ նա խելագար է, ով միջուկային զենք ու հեռահար հրթիռներ ունի, որոնցով կարող է հարվածել ԱՄՆ-ին։
Իրանի հոգեւոր առաջնորդ այաթոլլահ Ալի Խամենեիին Ռուբիոն անվանել է արմատական շիա հոգեւորական, որը պատրաստվում է միջուկային զենք մշակել եւ որը նույնպես կարող է հեռահար հրթիռ ստեղծել ԱՄՆ-ի վրա հարձակվելու համար, փոխանցում է ՌԲԿ-ն։
