Իրանահպատակ ադրբեջանցու սպանության համար ցմահ ազատազրկման դատապարտված ազատամարտիկ Սողոմոն Քոչարյանին «Դատապարտյալների հիվանդանոցից» տեղափոխել են «Գրիգոր Լուսավորիչ» ԲԿ: Այս մասին այսօր` օգոստոսի 29-ին, NEWS.am-ի հետ զրույցում ասաց նրա փաստաբանը` Գրիշա Բալասանյանը:
«Սողոմոնի վիճակը շարունակում էր մնալ ծանր, այդ պատճառով նրան տեղափոխել են քաղաքացիական հիվանդանոց, որտեղ նա շարունակում է գտնվել բժիշկների հսկողության տակ: Թույլատրել են, որ նրան խնամի մայրը»,-ասաց նա:
Փաստաբանը նշեց, որ Սողոմոն Քոչարյանի՝ վաղաժամ ազատ արձակվելու գործընթացն արդեն սկսվել է, եւ իր տեղեկություններով «Էրեբունի» ԲԿ-ից նրա ախտորոշումն ուղարկվել է քրեակատարողական հիմնարկ. «Երկուշաբթի արդեն պարզ կլինի, թե ինչ փուլում է գտնվում գործընթացը: Ամեն դեպքում հավաստիացնում էին, որ գործընթացն արհեստականորեն չի հետաձգվի»:
Հիշեցնենք, որ դեռևս օգոստոսի 20-ին «Էրեբունի» ԲԿ-ից Սողոմոն Քոչարյանի մորը տրամադրվել է որդու ախտորոշումը: Ըստ այդմ, 20 տարի անազատության մեջ գտնվող, պատերազմի 2-րդ կարգի հաշմանդամ Սողոմոն Քոչարյանը տառապում է սրտի իշեմիկ հիվանդությամբ՝ 4-րդ աստիճանի սրտային անբավարարությամբ (իշեմիկ կարդիոմիոպաթիա), ունի հետինֆարկտային խրոնիկ անևրիզմա, հիվանդ է նաև կանգային թոքաբորբով: Այս հիվանդությամբ նա ենթակա է պատժից ազատման` համաձայն Կառավարության 825-Ն որոշմամբ հաստատված պատժի կրման հետ անհամատեղելի հիվանդությունների ցանկի:
Նշենք, որ Սողոմոն Քոչարյանը մահապատժի է դատապարտվել 1995թ.՝ Ւրանի Իսլամական Հանրապետության քաղաքացուն Հայաստանում սպանելու համար, սակայն հետո պատիժը փոխարինվել էր ցմահ ազատազրկմամբ: Սողոմոն Քոչարյանը 2-րդ կարգի հաշմանդամ է, ՀՀ սահմանների պաշտպանության եւ ԼՂՀ ազատագրական պայքարի ակտիվ մասնակից: