ՀՀ քննչական կոմիտեի Երեւան քաղաքի Կենտրոն եւ Նորք-Մարաշ վարչական շրջանների քննչական բաժնում հարուցվել է քրեական գործ`Ամիրյան փողոցում տեղի ունեցած խուլիգանության դեպքի առթիվ:
2015թ. օգոստոսի 30-ին` ժամը 22:10-ին, ահազանգ է ստացվել, որ Երեւան քաղաքի Ամիրյան փողոցում վիճաբանություն եւ ծեծկռտուք է տեղի ունեցել ,հնչել են կրակոցներ, ինչի հետեւանքով մարմնական վնասվածքներով թիվ 1-ին համալսարանական բժշկական կլինիկա է տեղափոխվել երկու անձ:
Դեպքի վայրի զննությամբ հայտնաբերվել եւ առգրավվել են «Վոլտրան» տեսակի ատրճանակ, 1 փամփուշտ եւ 1 պարկուճ:
Դեպքի առթիվ նույն օրը հարուցվել է քրեական գործ՝ ՀՀ քրեական օրենսգրքի 258-րդ հոդվածի 4-րդ մասի հատկանիշներով (խուլիգանություն, որը կատարվել է զենքի գործադրմամբ):
Նախաքննությամբ նշանակվել են դատաբժշկական փորձաքննություններ, ինչպես նաեւ՝ դատաձգաբանական եւ դատամատնադրոշմային համալիր փորձաքննություն:
Նախաքննությունը շարունակվում է, միջոցներ են ձեռնարկվում՝ դեպքի բազմակողմանի եւ լրիվ հետազոտումն ապահովելու, ինչպես նաեւ՝ միջադեպին մասնակից անձանց շրջանակը պարզելու ուղղությամբ: