Գյումրիում այսօր՝ օգոսոստի 31-ի վաղ առավոտյան ծառից կախված վիճակում հայտնաբերված 25-ամյա Հայկ Զաքոյանը անապահով ընտանիքից էր, ընտանիքի միակ զավակը։ Այս մասին Գյումրիում NEWS.am-ի թղթակցին ասացին երիտասարդի հարեւանները՝ նշելով որ, այնուամենայնիվ, չեն կարծում, թե սոցիալական պայմանների պատճառով է տղան նման քայլի դիմել։
«Ինչքան էլ սոցիալական վիճակը վատ լիներ, մենք իրեն ընկճված չէինք տեսնում: Միշտ ասում էր, որ մի օր ինքը հաստատ լավ կապրի: Անգամ երբ լսում էր ինքնասպան եղած մարդկանց մասին, ասում էր` ուրեմն կամքի ուժ չունեն»,- ասաց հարեւաններից Անահիտ Գեւորգյանը՝ նշելով, որ Հայկը շփվել է իրենց հետ, օգնել, երբ դրա կարիքը եղել է:
Հարեւանները պատմեցին, որ Հայկը մշտական աշխատանք չուներ, բնակվում էր մոր հետ, որը նույնպես չի աշխատում։
«Կերթար դաշտերը, կարտոշկա կքանդեր, ուրիշների տների շինարարական աղբերը կտաներ կթափեր ու փող կհավաքեր: Երկու շաբաթ առաջ էդ փողով տան պատուհաններն է գցել»,- ասաց հարեւաններից Ալվարդ Գրիգորյանը:
Նշենք, որ փաստի առթիվ նյութեր են նախապատրաստվում:
Հարեւանները նաեւ պատմեցին, որ Հայկի հայրը հոգեկան խնդիրներ է ունեցել, մահացել է հոգեբուժարանում։
