Սիրիայում հայկական ազգային դպրոցներն ու վարժարանները պատրաստվում են նոր ուսումնական տարվան: Ինչպես հայտնում է Սիրիայում հրատարակվող «Գանձասար» հայկական թերթը, հայկական ազգային դպրոցների ու վարժարանների աշակերտները իրենց ամառային արձակուրդներն անց են կացրել Քեսաբում ու արդեն վերադարձել են Հալեպ:
Բացի դրանից Սիրիայում սկսել են ինտենսիվ նախապատրաստվել ձմռանը: Տարվում են նավթի պաշարներ ձեռք բերելու աշխատանքներ, չնայած նշվում է, որ նավթամթերքի գինը բարձրացել է:
Ինչ վերաբերում է Հալեպի ընդհանուր իրավիճակին, ապա պարբերականը նշում է, որ քաղաքի առանձին թաղամասեր ահաբեկիչների կողմից հրթիռակոծման են ենթարկվում, էլեկտրաէներգիայի մատակարարարումը կայուն չէ, քաղաքում ինտերնետ չկա:
Նշենք, որ Սիրիայում մինչեւ արյունալի իրադարձությունների սկիզբը 60-70 հազար հայ էր ապրում: Նրանց կեսից ավելին ապրում էր Հալեպում, իսկ մյուս կեսը ցրված էր այնպիսի քաղաքներում, ինչպիսիք են Լաթակիան, Հոմսը, Կամըշլին, Հասակէն, Յակուբիեն, Ռաքքան, Քեսաբը ու իհարկե մայրաքաղաքը՝ Դամասկոսը:
