Սահմանադրության նոր նախագծի ընդունումից հետո դատական իշխանության անկախության երաշխիքները կպակասեն: Այսօր՝ օգոստոսի 31-ին, լրագրողների հետ հանդիպմանը նման կարծիք հայտնեց Սահմանադրական դատարանի անդամ Կիմ Բալայանը:
«Դատական ամբողջ համակարգի ղեկավարումը՝ սկսած բյուջեի ձեւավորումից, տրվում է բարձրագույն դատական խորհրդին: Մինչդեռ այդ խորհրդին ընտրում են Դատական իշխանության եւ Ազգային ժողովի մարմնի կողմից: Նշանակում է, որ քաղաքական մարմնին իրավունք է վերապահվում ձեւավորվել դատական խորհրդի անդամներից կեսին: Կարծում եմ՝ լավ կլիներ, եթե դրա փոխարեն անդամներից 3-ին ընտրեր Փաստաբանների պալատը, իսկ 2-ին՝ Մարդու իրավունքի պաշտպանը»,- ասաց նա:
Կիմ Բալայանի պնդմամբ՝ որեւէ երկիր չի կարող օրինականություն ունենալ, եթե փաստաբաններն իրենց տեղը չունեն:
Հիշեցնենք, որ նախատեսվում է՝ արդեն աշնան վերջին կանցկացվի Սահմանադրության նոր նախագծի վերաբերյալ հանրաքվեն: