Չորեքշաբթի օրը Մինսկում տեղի կունենա ԱՊՀ անդամ երկրների Ներքին գործերի նախարարների խորհրդի նիստ. օրակարգում կլինեն համագործակցության առաջնահերթ հարցեր, «Ինտերֆաքս» գործակալությանը հաղորդել են Բելարուսի ՆԳՆ-ի մամուլի ծառայությունից:
Նիստի օրակարգում կլինեն ԱՊՀ պետությունների օրինապահ գերատեսությունների համագործակցության առաջնահերթ հարցեր: Մասնավորապես, կիբերհանցագործությունների, փոխադրամիջոցների առեւանգումների, նոր հոգեակտիվ նյութերի եւ թմրանյութերի շրջանառության, ինչպես նաեւ մարզական ակումբների երկրպագուների ոչ պաշտոնական միավորումների հակաօրինական գործողությունների դեմ պայքարի հարցեր:
Բացի այդ, անդրադարձ կլինի ԱՊՀ անդամ երկրների տարածքում Տվյալների մասնագիտացած բանկի գործունեության որոշ կողմերին:
Հավաքի շրջանակում տեղի կունենան նաեւ մի շարք երկկողմ բանակցություններ: Նիստը կավարտվի արդյունքներն ամփոփող փաստաթղթերի ստորագրմամբ:
Ինչպես ճշտել են մամուլի ծառայությունում, միջոցառմանը կմասնակցեն Ադրբեջանի, Հայաստանի, Ղազախստանի, Ղրղզստանի, Մոլդավայի, Ռուսաստանի, Տաջիկստանի եւ Ուզբեկստանի ՆԳՆ պատվիրակությունները, ԱՊՀ գործադիր կոմիտեի, ԱՊՀ տարածքում Կազմակերպված հանցավորության եւ այլ հանցատեսակների դեմ պայքարի համաձայնեցման բյուրոյի, ինչպես նաեւ Բելարուսի պետական մարմինների ներկայացուցիչներ:
Խորհրդի նիստից առաջ, ԱՊՀ ՆԳՆ/Ոստիկանությունների ղեկավարները կմասնակցեն Հաղթանակի հուշահամալիրին ծաղկեպսակ դնելու արարողությանը, ինչից հետո նախատեսված է նրանց հանդիպումը Բելարուսի վարչապետ Անդրեյ Կոբյակովի հետ, ավելացրել են նախարարությունից:
