Թուրքիայում առաջին անգամ քրդական կուսակցությունից նախարարներ դարձած Մուսլում Դողանը եւ Ալի Հայդար Քոնջան հերթական նորամուծությունն են արել՝ վերացնելով ընդդիմադիր լրատվամիջոցների համար մինչ այժմ գործող հավատարմագրման կարգը։
Թուրքական Sozcu պարբերականի փոխանցմամբ՝ «Ժողովուրդների դեմոկրատական» (HDP) կուսակցությունից Զարգացման նախարար Մուսլում Դողանը եւ Եվրամիության հետ հարցերով նախարար Ալի Հայդար Քոնջան հայտարարել են, որ վերացնում են ընդդիմադիր լրատվամիջոցների համար գործող հավատարմագրման կարգը։
Նախարարներն ասել են, թե այսուհետ բոլոր լրատվամիջոցները կարող են հետեւել նախարարություններում անցկացվող միջոցառումներին։ «Եթե մամուլն ազատ է, թող բոլորն էլ մասնակցեն, թող բոլորն էլ հետեւեն մեր հայտարարություններին»,-ասել են քուրդ նախարարները։
Նշենք, որ 2 քուրդ նախարարը ավելի վաղ հայտարարել էին թե հրաժարվում են նախարարների համար նախատեսված կարմիր համարանիշներից, թանկարժեք ծառայողական մեքենաներից եւ թիկնապահներից։