Հայ դիվանագետները արտասահմանում պետք է առավել ակտիվ պաշտպանեն երկրի տնտեսական շահերը։ Այս մասին օգոստոսի 31-ին կայացած Կառավարության նիստում հայտարարեց ՀՀ վարչապետ Հովիկ Աբրահամյանը։
«Ինչի՞ համար են օրինակ մեզ պետք այդքան շատ առեւտրային ներկայացուցչություններ, եթե դրանք առհասարակ չեն գործում։ Պետք է դրանց ակտիվանալու կոչ անել։ Այդ ինչպե՞ս է, որ դուք ասում եք, ԱՄՆ-ում առեւտրային ներկայացուցչության հաստիքային միավոր կա, իսկ ներկայացուցչությունը չկա։ Պետք է հասկանալ»,- ասաց Աբրահամյանը՝ դիմելով էկոնոմիկայի նախարար Կարեն Ճշմարիտյանին։
Անհրաժեշտ է բարձրացնել տնտեսության ոլորտում հայ դիվանագետների ակտիվությունը։ «Նրանք պետք է մտածեն այն մասին, թե ինչպես նոր ներդրումներ բերեն մեր երկիր, ինչպես առաջ մղեն արտահանումը։ Տեսեք, թե ինչ են անում մեր երկրում արտասահմանցի դիվանագետները։ Իսկ մե՞նք»,- ընդգծեց վարչապետը։
