Վանաձորում դանակահարության պատճառով մահացած 15-ամյա հանդբոլիստի գործով 3 տարով ազատազրկված՝ Լոռու գլխավոր վիրաբույժ Վլադիմիր Ղուկասյանի կալանքի մեկ տարին լրացել է, եւ ամենայն հավանականությամբ, առաջիկայում ազատ կարձակվի:
NEWS.am-ի թղթակցի հետ զրույցում վիրաբույժի փաստաբան Ռուբեն Հակոբյանը հայտնեց, որ առաջիկա օրերին քրեակատարողական վարչությունը պայմանական վաղակետ ազատման հարցն է քննարկելու:
«Այնուհետեւ արդեն 1 ամսվա ընթացքում դատական կարգով հարցը կլուծվի: Կարծում եմ՝ խոչընդոտներ չեն առաջանա, եւ Ղուկասյանն ազատ կարձակվի»,- ասաց փաստաբանը:
Հիշեցնենք, որ Վլադիմիր Ղուկասյանի փաստաբանը վերաքննիչ բողոք չի ներկայացրել առաջին ատյանի որոշման վերաբերյալ, որի համաձայն՝ բժիշկը դատապարտվել է 3 տարվա ազատազրկման:
Ավելի վաղ հայտնել էինք, որ 2013թ. հոկտեմբերի 12-ին «Վանաձոր» բժշկական կենտրոն էր տեղափոխվել Երեւանի 15-ամյա բնակիչ, դանակահարված Դավիթ Հովակիմյանը, որը ժամեր անց հիվանդանոցում մահացել էր:
Դեպքի առթիվ հարուցված քրգործի շրջանակում հաջորդ օրը ձերբակալվել էր նախկինում դատապարտված Կարեն Կունգուրցեւը՝ «Քուրդ» մականունով: Նրան մեղադրվում էր Հովակիմյանի սպանության մեջ: Ամիսներ անց, սակայն, Կունգուրցեւի մեղադրանքը փոփոխվել էր, քանի որ սույն գործով մեղադրանք էր առաջադրվել նաեւ Լոռու գլխավոր վիրաբույժ Վլադիմիր Ղուկասյանին: Ըստ մեղադրանքի՝ վերջինս իր մասնագիտական պարտականությունները կատարել էր ոչ պատշաճ եւ անզգուշությամբ առաջացրել բուժվող հիվանդ Դավիթ Հովակիմյանի մահը:
Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: