Հայաստանի կառավարությունը կսուբսիդավորի բնակչության սպառած ամբողջ էլեկտրաէներգիան: Այդ մասին որոշում է կայացվել Կառավարության օգոստոսի 31-ի նիստին:
Ինչպես հայտարարել է Էներգետիկայի եւ բնական պաշարների նախարար Երվանդ Զախարյանը, սուբսիդիաներ կհատկացվեն մեկ կիլովատտ/ժամի դիմաց 6,93 դրամի չափով ինչպես ցերեկային, այնպես էլ գիշերային սակագնով: Բնակչության պարագայում սուբսիդիա կտրամադրվի սպառված ամբողջ էլեկտրաէներգիայի դիմաց, իսկ ձեռնարկությունների ու կազմակերպությունների շրջանում սուբսիդիա կստանան 0,38 կիլովատտ լարման բաժանորդները, որոնք ամսական մինչեւ 500 կիլովատտ/ժամ էլեկտրաէներգիա են սպառում: Բաժանորդների այդ խմբին սուբսիդիա կտրամադրվի մինչեւ 250 կիլովատտ/ժամի համար:
Լրագրողների հետ զրույցում Զախարյանը նշել է, որ օգոստոսի 1-ից բնակչությանը փաստացիորեն հատկացվող սուբսիդիաների ծավալն առայժմ չի հաշվարկվել: «Շուտով կհաշվենք եւ կներկայացնենք», -հայտարարել է նա:
Նշենք, որ 2015-ի օգոստոսի 1-ից Հայաստանում էլեկտրաէներգիան թանկացել է 1 կիլովատտ/ժամի դիմաց 6,93 դրամով: Բնակչության համար ցերեկային սակագինը աճել է 16%-ով կամ մոտավորապես ՝ 10,3 ցենտով՝ հասնելով մինչեւ 48,78 դրամի: Սակագների սուբսիդավորումը կշարունակվի մինչեւ տենդերով ընտրված խորհրդատվական Deloitte & Touche CIS ընկերության եզրակացությունների ներկայացումը: Ընկերությունը կվերլուծի երկրի էներգոհամակարգը եւ Կառավարությանը էներգետիկայի մենեջմենտի վերաբերյալ խորհրդատվություն կներկայացնի: