Իսպանիայում մոլեգնում են անտառային հրդեհները. դրանք ընդգրկում են Իսպանիայի հյուսիս-արեւմտյան Օրենսե գավառում գտնվող անտառազանգվածը: Հրդեհները մոլեգնում են կիրակի օրվանից եւ արդեն ավելի քան 2000 հեկտար անտառ են ոչնչացրել: Կրակը ընդհուպ մոտեցել է բնակելի տներին: Տեղի շատ բնակիչներ ստիպված են եղել հեռանալ իրենց տներից:
Հրդեհը սկսվել է կիրակի կեսօրին: Հաշված ժամերի ընթացքում քամու պատճառով այն հսկայական տարածք է ընդգրկել:
Դրանից հետո պաշտոնյաները արտակարգ դրություն են հայտարարել, որովհետեւ տարերքը սպառնում է բնակելի տարածքների:
Իսպանական Europa Press գործակալության տվյալներով, ամենաքիչը մի տուն արդեն այրվել է: Բայց, ինչպես հաղորդվում է, այն լքված է եղել: Տարհանվածների ճշգրիտ թիվն առայժմ պարզ չէ:
Հրշեջներն ասում են, որ եղանակը նպաստում է կրակի տարածմանը եւ հեշտ չի լինի այն կասեցնել, փոխանցում է NTDTV-ը:
Ներկայումս տարերքի դեմ պայքարում է հրշեջների 20 բրիգադ, վեց ուղղաթիռ, ինը ինքնաթիռ եւ ցամաքային տեխնիկա: Բացի այդ, դեպքի վայր են ուղարկել տեխնիկական փորձագետների եւ անտառտնտեսության ներկայացուցիչների: