Հայաստանի կրթության եւ գիտության նախարար Արմեն Աշոտյանն այսօր հանդիպում է ունեցել ՀՀ-ում Մեծ Բրիտանիայի արտակարգ եւ լիազոր դեսպան Քեթրին Լիչը հետ, ով ավարտում է իր դիվանագիտական առաքելությունը մեր երկրում: Նախարարը շնորհակալություն է հայտնել դեսպանին՝ կրթության եւ գիտության ոլորտում արդյունավետ համագործակցության եւ բազմաթիվ ծրագրերի աջակցության համար: Արմեն Աշոտյանի խոսքով՝ Բրիտանական խորհուրդը համարվում է ԿԳՆ հուսալի գործընկերներից մեկը, որը թիրախային ծրագրեր է իրականացնում կրթության ոլորտում, մասնավորապես, լայն աջակցություն է ցուցաբերում ուսուցիչների՝ անգլերենի դասավանդման կատարելագործման, ինչպես նաեւ Բոլոնիայի գործընթացի շրջանակում գիտական աստիճանաշնորհման չափորոշիչների մշակման աշխատանքներին: Նախարարը նաեւ շնորհակալություն է հայտնել Լոնդոնում կազմակերպված Կրթության նախարարների համաշխարհային կրթական համաժողովին հայկական պատվիրակության աջակցության համար՝ ընդգծելով, որ նմանատիպ համաժողովները լավագույն հարթակներն են կրթական նորամուծությունների ներկայացման եւ գործընկերների հետ ակտիվ կապեր ստեղծելու տեսանկյունից:
Դեսպանը Քեթրին Լիչը, շնորհակալություն հայտնելով ընդունելության համար, նշել է, որ իրապես հաջող համագործակցության օրինակ են Երեւանում Բրիտանական բիզնես դպրոցի գործունեությունը եւ Կրթության գերազանցության ազգային ծրագիրը, որը մշակվել է` իբրեւ արարատյան բակալավրիատի միջազգային չափանիշներով պլատֆորմ ստեղծելու հենք՝ Լոնդոնի կրթության ինստիտուտի եւ Քեմբրիջի համալսարանի համագործակցությամբ: Նա նաեւ գոհունակությամբ նշել է, որ բացի TOEFEL-ից, իբրեւ անգլերենի իմացությունը հավաստող փաստաթուղթ, այսուհետ կընդունվի նաեւ Բրիտանական խորհրդի կողմից տրվող IELTS-ի հավաստագիրը: Դեպանը նաեւ բարձր է գնահատել Երեւանում անցկացված Բոլոնիայի նախարարական գագաթաժողովի աշխատանքները:
Հանդիպման ընթացքում անդրադարձ է եղել նաեւ Բրիտանական խորհրդի նոր նախաձեռնության՝ ուսուցիչների վերապատրաստման նոր ծրագրի մանրամասներին: