Առաջիկայում Հայաստանի Մարդու իրավունքների պաշտպանի գրասենյակը հստակ եւ ազնվորեն կարտահայտվի Սահմանադրական բարեփոխումների նախագծի մասին: Օգոստոսի 31-ի Կառավարության նիստից հետո այս մասին լրագրողներին հայտարարեց ՀՀ օմբուդսմեն Կարեն Անդրեասյանը:
«Առաջիկայում կավարտենք նախագծի ուսումնասիրությունը եւ հստակ գնահատականներ կտանք, հատկապես այն բաժինների մասին, որոնք վերաբերում են մարդու իրավունքներին: Կարող են լինել ե՛ւ դրական, ե՛ւ բացասական գնահատականներ՝ կախված այն հանգամանքից, թե ինչ կտեսնենք»,- հայտարարեց Անդրեասյանը:
Ամեն դեպքում, ըստ նրա, եթե անգամ օմբուդսմենի գրասենյակն ինչ-որ բան ընդունելի համարի, սահմանադրական բարեփոխումների դեմ արշավին չի միանա:
«Ես չպետք է անհարկի քաղաքականացնեմ մարդու իրավունքների պաշտպանի ինստիտուտը»,- հայտարարեց Անդրեասյանը:
Հիշեցնենք, որ Սահմանադրական բարեփոխումների նախագիծն արդեն ուղարկվել է խորհրդարան եւ քննարկվելու է աշնանային նստաշրջանի առաջին իսկ նիստում: ԱԺ խոսնակ Գալուստ Սահակյանի խոսքով, Սահմանադրական բարեփոխումների շուրջ հանրաքվեն կանցկացվի արդեն աշնան վերջին: