Գործարար Գերման Ստերլիգովին, որին Մոսկվայի Դոմոդեդովո օդանավակայանում ձերբակալել էին Ադրբեջանի հարցման առնչությամբ, իրավապահների հետ զրույցից հետո ազատ են արձակել: LifeNews-ի ուղիղ եթերում Ստերլիգովը պատմել է ձերբակալության հանգամանքների եւ պատճառների մասին:
«Խոսքն «Ահեղից մինչեւ Պուտին» ձեռնարկի մասին է, որը հրապարակվել է իմ կայքում: Դա այս ամռանն իմ բոլոր խնդիրների բանալին է»,- հաղորդել է Ստերլիգովը՝ նկատի ունենալով, որ այդ տեքստում Ադրբեջանի իշխանությունների տեսանկյունից կասկածելի հայտարարություններ կան Լեռնային Ղարաբաղի պատմության մասին:
Գործարարը նշել է, որ երեք ժամ շարունակ զրուցել է հատուկ ծառայությունների եւ իրավապահ մարմինների ներկայացուցիչների հետ:
LifeNews-ի տեղեկացմամբ, Դոմոդեդովո օդանավակայանում սահմանապահները Գերման Ստերլիգովին ձերբակալել են Ադրբեջանի ոստիկանության նախաձեռնությամբ: Այնտեղ ռուսաստանցի միլիոնատերը հետախուզվում է Քրեական օրենսգրքի միանգամից երկու հոդվածով. «Պետության դեմ ուղղված բացահայտ կոչեր» եւ «Պետական սահմանի ապօրինի հատում»:
Գործարարի փաստաբան Արթուր Հայրապետովը LifeNews-ի եթերում նաեւ հաղորդել է, որ Ադրբեջանի դեմ բողոք է ներկայացնելու Մարդու իրավունքների եվրոպական դատարան: Չնայած Ինտերպոլը դադարեցրել է Ստերլիգովի հետախուզումը, Ադրբեջանում նրա դեմ դեռեւս քրեական գործ է հարուցված: Սակայն հանրապետության իշխանությունները, Հայրապետովի խոսքով, արգելել են նրա մուտքը երկրի տարածք՝ նրան զրկելով պաշտպանվելու հնարավորությունից:
Մինչ այդ Գերման Ստերլիգովը նույնպես հիշեցրել էր, որ վերջին շրջանում իր դեմ քրեական գործ հարուցելու մի քանի փորձ արդեն արվել է, սակայն ոչ մեկը հաջողությամբ չի պսակվել: Խոսքը Ռուսաստանում ԲՈՐՆ-ի, ինչպես նաեւ զրպարտության գործի մասին է, որը Ստերլիգովի դեմ փորձել է հարուցել Իսրայելի քաղաքացի Միլանա Գորենշթեյնը: Գործարարը նախկինի պես կարծում է, որ այդպիսի ակտիվության հիմնական պատճառն իր գրած պատմության դասագիրքն է:
