ԱՄՆ–ում դատարանը մեղավոր է ճանաչել «Քու- քլուքս կլան» ուլտրաաջ կազմակերպության մասնաճյուղերից մեկի նախկին առաջնորդին երեք մարդու սպանության համար: Ինչպես հայտնում է «ՏԱՍՍ»-ը ՝ 74 ամյա Ֆրեյզեր Գլենն Միլլեր կրտսերը անցած տարվա ապրիլին սպանել է մի տարեց մարդու եւ նրա 14 ամյա թոռանը ՝ Օվերլենդ Փարքի (Քանզաս նահանգ) հրեական համայնքի կենտրոնի մոտ: Հետո նա գնացել է մոտակայքում գտնվող ծերանոց ու այնտեղ սպանել մի կնոջ:
Միլլերը կրակում էր որսորդական հրացանից, սակայն նրա մոտից առգրավել են նաեւ մեկ ատրճանակ եւ մեկ այլ հրացան: Նա ծանոթ չէր իր զոհերի հետ ու գործել է առանց հանցակիցների: Ավելի վաղ, լսումների ժամանակ տղամարդը հայտարարել էր, որ սկսել է կրակել, քանի որ «ուզում էր սպանել հրեաներին»:
Միլլերի վերջնական դատավճիռը կհայտարարվի ավելի ուշ: Նրան սպառնում է ցմահ բանտարկություն կամ մահապատիժ: