Իրաքի Նայնավա նահանգում երկուշաբթի օրը, օգոստոսի 31-ին, մահապատժի են ենթարկվել «Իսլամական պետություն» ահաբեկչական կազմակերպության ավելի քան 120 գրոհայիններ, հայտնում է Al Sumaria հեռուստաալիքը ՝ վկայակոչելով «Քուրդիստանի դեմոկրատական կուսակցության» ներկայացուցիչ Սաիդ Մամուզինիին: Նրա խոսքով, խմբավորման մասնակիցներին մեղադրել են հեղաշրջման եւ ԻՊ առաջնորդ Բաքր ալ Բաղդադիին ոչնչացնելու փորձի համար:
Մամուզինին ճշգրտել է, որ հեղաշրջումը պետք է կատարվեր կիրակի օրը, օգոստոսի 30-ին: «Բայց երկու օր առաջ հինգ ձերբակալված գրոհայիններ բացահայտել են դավադիրների ծրագրերը»,- պատմել է նա: Դրա հետեւանքով 122 գրոհայիններ, այդ թվում դաշտային հրամանատարներ, գնդակահարվել են Մոսուլի հարավում գտնվող բանտում, հայտնում է Lenta -ն:
Մամուզինիի խոսքով, «ԻՊ ի պառակտումն ավելի ու ավելի ակնհայտ է դառնում»: Փողի, իշխանության եւ ազդեցության բաշխման պայքարում տասնյակ գրոհայիններ են զոհվել, հավելել է «Քուրդիստանի դեմոկրատական կուսակցության» ներկայացուցիչը: