Հայաստանում իշխանությունները վախի մթնոլորտ չեն ստեղծել, իսկ ԱԺ ՀՀԿ խմբակցության պատգամավորներ Մհեր Սեդրակյանի, ՀՖՖ նախագահ Ռուբեն Հայրապետյանի հետ կապված վերջին միջադեպերով զբաղվում են իրավապահ մարմինները և եթե նրանք մեղավոր եղած լինեին, ապա արդեն քրեական գործեր հարուցված կլինեին: Այս մասին այսօր՝ սեպտեմբերի 1-ին, լրագրողներին ասաց ԱԺ նախագահ Գալուստ Սահակյանը:
«Եթե այդպիսի միջադեպեր եղել են, բա ինչո՞ւ մինչև հիմա քրեական գործ չի հարուցվել: Համապատասխան մարմինները զբաղվում են այդ միջադեպերով, և եթե ինչ-որ բան լիներ, ապա հանրությանը կներկայացվեր: Երկրում վախի մթնոլորտ չկա, եթե իշխանությունը վախեցնելու ճանապարհով գնար, ապա այսօր այդ սարքավորումը ձեռքերիդ այդպիսի հարց չէիք կարողանա տալ» ,-ասաց Գալուստ Սահակյանը` նկատի ունենալով լրատվամիջոցների ներկայացուցիչների տեսախցիկները։
Ավելի վաղ NEWS.am-ը տեղեկացրել էր, որ «Ներազգային ազատագրական շարժում» նախաձեռնության ղեկավար Վահան Մարտիրոսյանին եւ նրա կնոջը իրենց տանը մի խումբ անձինք ծեծի են ենթարկել: Վահան Մարտիրոսյանի խոսքով՝ իրենց ծեծի են ենթարկել ԱԺ ՀՀԿ խմբակցության պատգամավոր Մհեր Սեդրակյանի մտերիմներն ու թիկնազորի ներկայացուցիչները:
Տեղեկացրել էինք նաեւ, որ Air Armenia ավիաընկերության տնօրեն Արսեն Ավետիսյանի խոսքով` Հայաստանի ֆուտբոլի ֆեդերացիայի նախագահ Ռուբեն Հայրապետյանը օգոստոսի 15-ին իրեն հրավիրել է հանդիպման Ֆուտբոլի ֆեդերացիայի ակադեմիա, որտեղ թիկնապահներն իրեն ծեծի են ենթարկել:
