Պետք չէ ռուսական շուկայում հեղինակազրկել հայկական ձուկը՝ երրորդ երկրներից ձուկ վերարտահանելով: Այս մասին NEWS.am-ի թղթակցի հետ զրույցում հայտարարեց Հայաստանի ձկնաբույծների միության նախագահ Արթուր Աթոյանը:
«Անիմաստ է: Ավելի լավ է սեփական արտադրանքն արտահանել: Այլ հարց է, որ արտասահմանյան ձկան ինքնարժեքը կարող է ավելի էժան լինել: Այս դեպքում հարկավոր է պարզապես սովորել նրանցից: Իհարկե, չի բացառվում, դա ֆինանսապես կարող է շահավետ լինել: Սակայն հեղինակությունը պետք է ավելի թանկ լինի իրեն հարգող ցանկացած ձեռներեցի համար»,- հայտարարեց Աթոյանը:
Նշենք, որ օրեր առաջ Ռոսսելխոզնադզորը սահմանափակել է նորվեգական 14 ընկերություններից ձկան մատակարարումը, այդ թվում՝ փակելով տարանցումը ԵՏՄ անդամ մյուս հանրապետություններ՝ Բելառուս, Ղազախստան եւ Հայաստան, խուսափելու համար պատժամիջոցների ցանկում հայտնված ապրանքների վերարտահանումը Ռուսաստան:
Ամեն դեպքում, ԵՏՄ մյուս պետությունների համապատասխան ծառայություններն իրավունք ունեն թույլատրել նորվեգական ձկան ներկրումը, եթե տարանցումն իրականացվելու է՝ շրջանցելով Ռուսաստանը:
Նշենք, որ 2014 թվականին Հայաստանը 16.5 մլն դոլարի ձուկ է արտահանել, գրեթե ամբողջությամբ՝ Ռուսաստան:
