Հայտնի է դարձել ՌԴ Ռոստովի մարզում սպանված 23-ամյա Ռաֆայել Խլղաթյանի քաղաքացիությունը։
Ինչպես NEWS.am-ի թղթակցին հայտնել են ՀՀ Գլխավոր հյուպատոսարանից, սպանվածը Հայաստանի քաղաքացի է։ Սպանության առնչությամբ հետաքննություն է ընթանում, ասել են հյուպատոսարանից։
Ավելի վաղ հաղորդվում էր, որ 23-ամյա երիտասարդի նկատմամբ գազանաբար հաշվեհարդար էին տեսել նրա համագյուղացիները։ Ոստիկանության տեղեկություններով՝ անցյալ կիրակի, երբ Սինյավսկոե գյուղում նշում էին գյուղի տոնը, երիտասարդը նստել էր մեքենայի ղեկին, կորցրել ղեկի կառավարումը եւ բախվել կայանված մեքենաներին, ինչի համար նրան դաժան ծեծի էին ենթարկել։
Վնասված մեքենաների սեփականատերերի ինքնությունն արդեն պարզ է։ Նրանք բոլորը Սինյավսկոե գյուղի բնակիչներ են։ Իսկ թե ով է ծեծի ենթարկել տղային եւ նրա հորը, պարզ չէ։ Բացառված չէ, որ դրանք տեղաբնիկներ չեն եղել։ Ռոստովի մարզի քննչական կոմիտեն հայտնել է, որ կասկածյալների շրջանակն արդեն հայտնի է։ Ներկայումս միջադեպի բոլոր մասնակիցներին հարցաքննում են։ Հարուցվել է քրեական գործ «Դիտավորյալ կերպով մահացու մարմնական վնասվածք» հասցնելու հոդվածով։ Ձերբակալվել է հաշվեհարդարի մեկ մասնակից։ Հարցաքննության ընթացքում միանգամից մի քանի վկա հայտնել են, որ ճակատագրական հարվածը, որից մահացել է Ռաֆայել Խլղաթյանը, հասցրել է 46-ամյա Անդրեյ Զ.-ն։