Երեւանում վրաերթի ենթարկված Հալիլ Ֆերմանի Իչին ծագումով հայ է եւ երկքաղաքացիություն ունի: Այս մասին NEWS.am-ի թղթակցին ասաց Իչիի մորեղբայրը՝ հերքելով տեղեկությունները, թե տաքսու վարորդ Էդգար Պետրոսյանի կողմից դիտավորյալ վրաերթի ենթարկված Իչին թուրք է եւ Թուրքիայի քաղաքացի:
«Էդգար Պետրոսյանի կնոջ հայտարարությունը, թե Իչին իրենց պարտք է եղել 3000 ԱՄՆ դոլար, դրա համար են վրաերթի ենթարկել, իրականությանը չի համապատասխանում: Իմ քրոջ որդին գործարար է, Հայաստանում 2 միլիոն դոլարանոց շենք է կառուցում, ո՞նց կարող է պարտք անել մեկից, ում 3-4 օր է ճանաչել, կամ էլ հրաժարվել է այդ գումարը վերադարձնել: Նման բան չկա»,- ասաց Իչիի մորեղբայրը՝ Արամ Էբոլակը:
Նա պատմեց, որ Էդգար Պետրոսյանն Իչիին վրաերթի է ենթարկել՝ կողոպտելու նպատակով. գողացել է 40 հազար դրամ, բանկային քարտերն ու Իչիին թողնելով անօգնական վիճակում՝ դիմել փախուստի. «Ես եմ նրան հիվանդանոց տարել, երկար ժամանակ պառկել է, բուժվել, կոտրվածքներ ուներ: Իսկ Էդգար Պետրոսյանին հայտնաբերել են ոստիկանները դեպքի վայրում առկա տեսախցիկների օգնությամբ»:
Ավելի վաղ Էդգար Պետրոսյանի կինը՝ Աննա Ա.-ն, NEWS.am-ի հետ զրույցում պատմել էր, որ Իչին հրաժարվել է վերադարձնել 3000 ԱՄՆ դոլար պարտքը, ինչի պատճառով էլ ամուսինը բարկացել էր եւ դիտավորյալ վրաերթի ենթարկել նրան:
Հիշեցնենք, որ ըստ մեղադրական եզրակացության՝ Էդգար Պետրոսյանն իր կողմից օրավարձով շահագործվող ավտոմեքենայով Թուրքիայի քաղաքացի Հալիլ Ֆերմանի Իչին հերթական անգամ տեղափոխելու ժամանակ գումարային պարտք ու պահանջի հետ կապված վիճաբանության է բռնվել վերջինիս հետ: Վիճաբանության ժամանակ Էդգարը դանակ է բարձրացրել եւ թափահարելով սպանության սպառնալիք է տվել: Սակայն Հալիլ Իչը խլել է դանակը ու դուրս գալով ավտոմեքենայի սրահից դիմել փախուստի: Էդգար Պետրոսյանը փախուստը կանխելու դիտավորությամբ ավտոմեքենայի լուսարձակները միացնելով հետապնդել է Հալիլ Իչին եւ դիտավորյալ վրաերթի ենթարկել նրան:
Էդգար Պետրոսյանին մեղադրանք է առաջադրվել Քրեական օրենսգրքի 112-րդ եւ 137-րդ հոդվածների 1-ին մասերով: Խափանման միջոց է ընտրվել ստորագրություն չհեռանալու մասին:
Գործը քննվում է Աջափնյակ եւ Դավթաշեն վարչական շրջանների ընդհանուր իրավասության դատարանում: