Հայաստանում արդյունաբերական արտադրության ֆիզիկական ծավալները հուլիսին տարեկան կտրվածքով կրճատվել են 1.2 տոկոսով։ Հիշեցնենք, որ անկումը նկատվում էր արդեն տարվա սկզբից. հունվարին այն պակասել էր 6.3 տոկոսով։ Այնուհետեւ իրավիճակը փոխվեց դեպի լավը, իսկ ապրիլին գրանցվեց հայրենական արդյունաբերական արտադրության ֆիզիկական ծավալների անգամ երկնիշ աճ՝ 10.6 տոկոս։
Նշենք, որ առաջատար առանձին ճյուղերը հուլիսին հիանալի արդյունք են ունեցել։ Այսպես՝ հանքարդյունաբերության արտադրանքի ֆիզիկական ծավալները եւ բաց հանքերի մշակումը աճել են մոտ 32.3 տոկոսով, իսկ ծխախոտային արտադրանքի ծավալները՝ մոտ 93.5 տոկոսով։ Սակայն մշակող արդյունաբերության մի շարք այլ ճյուղերի բացասական արդյունքը իր ստվերում թողեց այս դրական աճը։
Արդյունքում մշակող արդյունաբերությունը, չնայած ծխախոտի արտադրության նշված աճին, հուլիսը փակեց անկումով։ Ընդ որում, ամենամեծ լուման «ներդրեց» այդ գործում սննդամթերքի եւ խմիչքի արտադրության ոլորտը, որոնք գրանցեցին համապատասխանաբար 17.9 եւ 36.8 տոկոս անկում։
Եթե մանրածախ ապրանքաշրջանառության ֆիզիկական ծավալների անկման տվյալները (հունվար-հուլիս 6.2 տոկոս) համապատասխանում են իրականությանը, ապա դա բացահայտ խոսում է բնակչության վճարունակության կրճատման մասին։ Այստեղ անխոս իր դերն է խաղացել այլ երկրներից, մասնավորապես Ռուսաստանից կատարված մասնավոր տրանսֆերտների կրճատումը։ Հունվար-հուլիս ամիսների տվյալներով՝ Հայաստան կատարված դրամական փոխանցումների հոսքը տարեկան հաշվարկով պակասել է 237.6 մլն դոլարով կամ 30.5 տոկոսով։ Այս գործոնով կարելի է բացատրել նաեւ սննդամթերքի արտադրության ոլորտում անբարենպաստ միտումները։
Ինչ վերաբերում է ըմպելիքներին, որոնց արտադրության ծավալի առյուծաբաժինը հասնում է կոնյակին, ապա այստեղ անկումը պայմանավորված է վերջինիս արտահանման կրճատմամբ։ Հայտնի է, որ զգալիորեն պակասել են հայկական կոնյակի արտահանման ծավալները Ռուսաստան, որը դրա սպառման հիմնական շուկան է։ Պաշտոնական տվյալներով՝ խմիչքի արտահանումը ԱՊՀ երկրներ հունվար-հուլիս ամիսներին պակասել է 41 տոկոսով։ Այդ շրջանում Հայաստանում կոնյակի արտադրության ծավալները կրճատվել են 11.6 տոկոսով։
Արդյունաբերության մեկ այլ բացասական կողմը աշխատակիցների քանակի կրճատումն է։ 2015թ. առաջին կիսամյակում աշխատակիցների միջին թվաքանակը պակասել է 2.2 հազարով կամ 2.6 տոկոսով։ Ընդ որում հիմնականում կրճատվել է փոքր ձեռնարկությունների անձնակազմը։