Էլեկտրաէներգիայի սակագնի բարձրացման դեմ պայքարող «Ոչ թալանին» նախաձեռնությունը այսօրվանից սկսում է պայքարի նոր փուլ: Նախաձեռնության մի քանի տասնյակ անդամներ այսօր՝ սեպտեմբերի 1-ին, հավաքվել են Սիրահարների այգում՝ քննարկելու իրենց հետագա անելիքները: NEWS.am–ի թղթակիցը հաղորդում է, որ Սիրահարների այգում մեծ թվով ոստիկաններ կան։
Լրագրողների հետ զրույցում նախաձեռնության անդամներից Մաքսիմ Սարգսյանը նշեց, որ չի բացառվում, որ այսօրվանից սկսվեն ամենօրյա բողոքի ակցիաները եւ նստացույցը Բաղրամյան պողոտայում:
«Մեր Կառավարությունն իրեն բնորոշ կերպով է առաջ գնում, երեւի թե փողոցային ժարգոն է, բայց իրենց բնորոշ է՝ կրուտիտ են լինում, այսինքն էն հայտարարությունները, որոնք արեց Սերժ Սարգսյանը, որ թանկացման ամբողջ բեռն իր վրա կվերցնի կառավարությունը, չիրականացավ: Կառավարությունը սկսեց էդ կրուտիտի տարբերակով ասել, որ` ոչ, մեծ ձեռնարկատերերին չենք սուբսիդավորի»,- ասաց ակտիվիստը` նշելով, որ եթե խոշոր բիզնեսը չսուբսիդավորվի, դա առաջ կբերի առաջնային սպառման ապրանքների թանկացում:
Մաքսիմ Սարգսյանի խոսքով՝ իրենց հիմնական պահանջը շարունակում է մնալ նույնը՝ էլեկտրաէներգիայի սակագնի բարձրացման մասին չեղարկման որոշումը: Նշենք, որ «Ոչ թալանին» նախաձեռնությունը պահանջում է նաեւ վերանայել էլեկտրաէներգիայի նախկին սակագինը եւ պատժել հունիսի 23-ին ցուցարարների նկատմամբ բռնություն կիրառած ոստիկաններին:
Հիշեցնենք, որ օգոստոսի 1-ից ուժի մեջ է մտել էլեկտրաէներգիայի սակագնի բարձրացման որոշումը: Վարչապետ Հովիկ Աբրահամյանը հայտարարել է, որ ավելացված 6.93 դրամը կսուբսիդավորվի արտաբյուջետային միջոցներից՝ «Որոտան» կասկադի վաճառքից ստացված գումարից: