Էլեկտրաէներգիայի թանկացման դեմ պայքարը վերսկսած` «Ոչ թալանին» նախաձեռնության անդամները Սիրահարների այգում հանրային քննարկման նպատակով հավաքվելուց հետո տեղափոխվել են նախագահական նստավայրի դիմաց մայթ եւ պահանջում են հանդիպում Սերժ Սարգսյանի հետ։ (ֆոտոռեպորտաժ)
NEWS.am–ի թղթակիցը հաղորդում է, որ ոստիկանները սկզբում փորձել են խոչընդոտել նրանց տեղաշարժը` պատճառաբանելով, որ ակցիան արտոնված չէ, ավելի ուշ թույլ են տվել կանգնել նախագահականի դիմացի մայթին։
Երեւանի փոխոստիկանապետ Վալերի Օսիպյանը ակտիվիստներին նախազգուշացրեց, որ թույլ է տալիս բողոքի ակցիան իրենց ուզած վայրում անցկացնել` պայմանով, որ նրանք կխոստանան չանցնել մայթը։
Ավելի ուշ, սակայն, ակցիայի մանսակիցներից մոտ երկու տասնյակը փորձել են անցնել նախագահականի մայթ, ոստիկանները նրանց հերթով ուժով հեռացրել են։
Այս պահին իրավիճակը Բաղրամյան պողոտայում լարված է։ Մոտ հարյուր ցուցարարներ սուլում են` պահանջելով, որ նախագահն ընդունի իրենց։ Ակցիան հսկում են մեծ թվով ոստիկաններ։ Նրանց եւ ակցիայի մանսակիցների միջեւ ընդհարումներ են լինում։ Դրանցից մեկի ժամանակ պատռվել է նախաձեռնության անդամներից Մաքսիմ Սարգսյանի շապիկը։
Ոստիկանների թիվը գնալով մեծանում է։ Ցուցարարները բաժանվել են երեք խմբի, մեկը` Ամերիկյան համալսարանի մոտ, մյուս երկուսը` Պռոշյան–Բաղրամյան խաչմերուկի երկու կողմերում։
Հիշեցնենք, որ հունիսի 22-ից Բաղրամյան պողոտայում «Ոչ թալանին» նախաձեռնությունը նստացույց սկսեց ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին քաղաքացիների համար թանկացումը սուբսիդավորելու մասին` Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչեւ հուլիսի 6-ը շարունակվեց նստացույցը:
