Բաղրամյան պողոտայում այսօր՝ սեպտեմբերի 1-ին, Էլեկտրաէներգիայի թանկացման դեմ պայքարը վերսկսած` «Ոչ թալանին» նախաձեռնության անդամներից շատերը վնասվածքներ են ստացել ոստիկանների հետ բախումների հետեւանքով: (ֆոտոռեպորտաժ)
«3-րդ կարգի հաշմանդամն եմ, ուզում էի` փողոցը անցնեի, բախումն սկսվեց ու ոստիկանները հուպ տվեցին, ականջով, ոտքով թեով տրորեցին: Բղավոցներս չէին լսում, հազիվ դուրս եկա էդտեղից»,-ասաց Մարիամ Պողոսյանը, որը թեթեւ քերծվածքներ էր ստացել ականջի եւ թեւի շրջանում:
Բախումների ժամանակ աչքի տակ քերծվածք է ստացել նաեւ ակտիվիստ Վահրամ Պետրոսյանը: Նա մեզ հետ զրույցում պատմեց, որ չի նկատել, թե կոնկրետ որ ոստիկանից է հարված ստացել, բայց վստահ է, որ ոստիկան է իրեն հարվածել:
Նախաձեռնության անդամ Մաքսիմ Սարգսյանը պատմեց, որ տեսել է, թե ինչպես են ոստիկանները հարվածել ցուցարարներին՝ նշելով, որ ինքը նույպես վնասվածք է ստացել մեջքի շրջանում:
NEWS.am-ի թղթակիցը փոխանցում է, որ բախումների հետեւանքով վնասվածք է ստացել նաեւ երկու աղջիկ ցուցարար:
Բաղրամյան պողոտայում իրավիճակը շարունակում է լարված մնալ: Ակտիվիստները դեռեւս չեն հստակեցրել իրենց հետագա անելիքները:
Վաղինակ Շուշանյանը անընդհատ փորձում է ճեղքել ոստիկանական պատը, սակայն դա նրան չի հաջողվում:
Լուսանկարները՝ Արսեն Սարգսյանի /NEWS.am