Բաղրամյան պողոտայում այսօր՝ սեպտեմբերի 1-ին, «Ոչ թալանին» նախաձեռնության ակցիայի ժամանակ վնասվածքներ ստացած Վաղինակ Շուշանյանը դիմել է Մարդու իրավունքների պաշտպանին: NEWS.am-ի հետ զրույցում, Վաղինակ Շուշանյանը նշեց, որ ոստիկաններն իրեն մի քանի կողմից հարվածել են:
«Ակցիայի ժամանակ ինձ քաշքշեցին, հայհոյեցին, հետո ոստիկաններից մեկը հարվածեց կրծքավանդակիս, որն առանց այն էլ վնասված էր: Հիմա ցավերը սկսվել են, ձեռքերիս հատվածում էլ ունեմ վնասվածքներ, բռունցքներով մի քանի անգամ երիկամներիս են խփել: Բացի այդ նաև խեղդող հնարք են կիրառել իմ դեմ»,-ասաց Վաղինակ Շուշանյանը՝ նշելով, որ իր կրծքավանդկին հարվածող ոստիկանի դեմքը հիշում է, բայց ոստիկանություն չի դիմի, քանի որ անիմաստ է համարում:
Ավելի վաղ տեղեկացրել էինք, որ «Ոչ թալանին» նախաձեռնությունը հայտարարել է` այսօրվանից վերսկսում է պայքարը էլեկտրաէներգիայի թանկացման դեմ, քանի որ իրենց նախկին պահանջները չեն կատարվել:
Նախագահական նստավայրին մոտենալու փորձերի ժամանակ ոստիկանների եւ ակտիվիստների միջեւ բախումներ էին տեղի ունեցել, ոստիկանները բերման էին ենթարկել վեց ակտիվիստի, որոնցից 5–ին ավելի ուշ ազատ են արձակել։