Մի քանի օր առաջ ընկերոջ հոր կողմից ծեծի ենթարկված՝ 12-ամյա Մարտին Բալյանի դեպքով նյութեր են նախապատրաստվում: Այս մասին NEWS.am-ի թղթակցին հայտնեցին ոստիկանության լրատվական ծառայությունից:
Ոստիկանությունում հաղորդում է ստացվել դեպքի մասին, եւ այժմ Շենգավիթի բաժնում նյութեր են նախապատրաստվում:
Ավելի վաղ Մարտինի մայրը` Լալա Բալյանը, NEWS.am-ի թղթակցի հետ զրույցում հայտնել էր, որ տեսախցիկները ֆիքսել են` ինչպես է հարեւանը դաժանորեն ծեծում որդուն երեխաների միջեւ թեթեւ վիճաբանությունից հետո:
«Կամերայով երեւում ա`վազելով գալիս ա իրա պապան, ոտքով հարվածում ա մեջքին, հետո դեմքին, երեխեն ընկնում ա գետնին, ուշքը գնում ա, նորից գլխից բռնում ա, նորից դեմքին ա հարվածում, նորից գնում ա էն կողմ, էս անգամ էլ քարն ա հետեւից շպրտում, բայց լավ ա, քարը չի կպնում»,- ասել էր Լալա Բալյանը՝ նշելով, որ երեխաների միջեւ ընդամենը խոսակցություն է եղել: Մարտինը ստացել է քթի կոտրվածք, գանգուղեղի ցնցում: