ԲՀԿ-ն չի միանալու Սահմանադրական բարեփոխումներին «Ոչ» ասելու ՀԱԿ-ի հայտարարած քարոզարշավին: Այս մասին NEWS.am-ի թղթակցի հետ զրույցում ասաց ԱԺ ԲՀԿ խմբակցության ղեկավար Նաիրա Զոհրաբյանը:
«Մեզ համար մեկ բան հստակ է, որ մենք չենք միանալու ՀԱԿ-ի հայտարարած «Ոչ» ասելու քարոզարշավին: Մենք կրկին ասում ենք, որ հարգում ենք բոլոր քաղաքական ուժերի դիրքորոշումը, յուրաքանչյուր քաղաքական ուժ իրավունք ունի ունենալու իր դիրքորոշումը, իր օրակարգը եւ ես բոլոր քաղաքական ուժերին կոչ եմ անում զբաղվել սեփական գործով, եւ ոչ թե սեփական գործը թողած փորձել վարկաբեկել, շանտաժի ենթարկել կամ պախարակել այն ուժերին, որոնք հրաժարվում են տեղավորվել այդ քաղաքական ուժերի օրակարգի մեջ: Ավելին` չի բացառվում, որ առաջիկայում ԲՀԿ-ն հանդես գա բոլոր քաղաքական ուժերին ներքին քաղաքական ջենթլմենական պայմանավորվածություն ձեռք բերելու առաջարկությամբ քարոզարշավի ընթացքում` անկախ նրանից, թե որ քաղաքական ուժը ինչ ուղղությամբ կգնա»,- ասաց նա:
Նաիրա Զոհրաբյանը նշեց, որ եթե շարունակվի ԲՀԿ-ն վարկաբեկելու, սպառնալու ընտրված մարտավարությունը այլ քաղաքական ուժերի կողմից, ապա իրենք բոլոր ռեսուրսներն օգտագործելու են համարժեք պատասխան տալու համար:
«Մեր ռեսուրսները լրատվական դաշտում հարյուրապատիկ պատասխանելու եւ շատ ավելի բաց փակագծերով խոսելու մեզ շանտաժի ենթարկողների եւ մեզ սպառնացողների հետ շատ ավելին են, բայց մենք այս պահին նման քայլի չենք դիմում եւ բոլորին կոչ ենք անում հարգել այլոց դիրքորոշումը եւ զբաղվել սեփական գործունեությամբ»,-ասաց նա:
