Հայաստանի իշխանությունները բնակչությանը սոցիալական երաշխիքներ չեն տալիս, եւ Սահմանադրության մեջ նոր կետեր ընդգրկելով՝ հարցը չի լուծվի։ Այս մասին սեպտեմբերի 2-ին լրագրողներին հայտարարեց նախկին պատգամավոր, իրավաբան Վարդան Խաչատրյանը՝ մեկնաբանելով Սահմանադրության նոր նախագիծը։
Նշենք, որ նոր Սահմանադրությամբ պետության սոցիալական երաշխիքներին առանձին գլուխ է հատկացված։ Ներառվում է կյանքի արժանավայել մակարդակի հասկացությունը, որն անհրաժեշտ է ապահովել կարիքավորների եւ ծերերի համար, ինչպես նաեւ սահմանվում է նվազագույն աշխատավարձ սահմանելու անհրաժեշտությունը։
Հարցին, թե ինչո՞վ է պայմանավորված այդ դրույթները օրենսդրական դաշտից Սահմանադրություն տեղափոխելու նախագիծը, Խաչատրյանը պատասխանեց. «Դրա համար սկզբում անհրաժեշտ է ապացուցել, որ այդ դրույթները չեն գործում օրենքի մակարդակով, այդ պատճառով էլ դրանց կարգավիճակը պետք է բարձրացնել մինչեւ սահմանադրականի։ Այդ դեպքում դրանց տեղափոխումը Սահմանադրության դաշտ արդարացված է։ Սակայն ես նման մոտեցում չեմ նկատել»,- ընդգծեց Խաչատրյանը։
«Կյանքի արժանավայել մակարդակը իհարկե լավ է, սակայն կան դրա տարբեր չափանիշներ։ Իսկ հիմա եկեք նայենք իրական կյանքին։ Հնարավո՞ր է արդյոք մեր երկրում մեզ եւ մեր երեխաների համար ինչ-որ կենսական պլան կազմել ապագայի համար։ Իհարկե ոչ։ Այստեղից էլ երկրում լարվածություն է առաջանում»,- հավելեց իրավաբանը։
