ԵԱՀԿ Մինսկի խմբի համանախագահները չեն հրաժարվել Հայաստանի եւ Ադրբեջանի նախագահների հանդիպման կազմակերպման գաղափարից։
Ինչպես Аzernews-ին տված հարցազրույցում հայտարարել է ԵԱՀԿ ՄԽ ամերիկացի համանախագահ Ջեյմս Ուորլիքը, համանախագահները սեպտեմբերին ՄԱԿ Գլխավոր Ասամբլեայում հանդիպումներ կունենան հակամարտ կողմերի արտգործնախարարների հետ։
«Մենք նախարարների հետ երկու նախագահների հաջորդ հանդիպման հնարավորությունը կքննարկենք ավելի ուշ»,- ասել է Ուորլիքը՝ հավելելով, որ համանախագահները պլանավորում են աշնանն այցելել տարածաշրջան։
Անդրադառնալով ադրբեջանական եւ հայկական զորքերի շփման կրակագծում իրավիճակի լարմանը՝ Ուորլիքը նշել է, որ տարվա մեծ մասը իրավիճակը շփման գծում հարաբերական կայուն է մնացել։
«Մենք կողմերին կոչ էինք արել թուլացնել լարվածությունը եւ խստորեն պահպանել հրադադարի պահպանման ռեժիմը։ Մենք նաեւ շարունակում ենք միջոցներ առաջարկել վստահության ամրապնդման համար, որոնք ամրացնում են հրադադարի պահպանման ռեժիմը՝ ավելի բարենպաստ հող ստեղծելով բանակցությունների համար, որոնք կարող են բերել կարգավորման»,- ասել է դիվանագետը։