Նավթի հարցերով մասնագիտացող Andurand Capital ներդրումային հիմնադրամի ղեկավար ու հիմնադիր Պիեր Անդյուրանի կարծիքով մոտ ժամանակներս WTI մակնիշի նավթի գինը կարող է իջնել մեկ բարելի դիմաց 30 դոլարից էլ ցածր մակարդակի: Անդյուրանը հայտնի է դարձել 2008 թ. երբ հաջողությամբ կանխագուշակել է նավթի գների արագ աճը ու դրան հաջորդող արագ անկումը:
Ներդրողի կարծիքով նավթի գները տատանվելու են 25-50 դոլարի միջակայքում: «Իմ կանխատեսումներով մոտակա երկու տարիներին WTI մակնիշի նավթի գինը կտատանվի 25-50 դոլարի միջակայքում»,- մեջբերում է Անդյուրանի խոսքերը The Financial Times թերթը:
2008 թ. Brent մակնիշի նավթի գինը հասել էր իր պատմական առավելագույնին ՝ բարելի դիմաց 143.95 դոլարի: Սակայն համաշխարհային ֆինանսական ճգնաժամի սկսվելուց հետո նավթի գները սկսել են անկում ապրել եւ այդ նույն տարվա դեկտեմբերին Brent-ի մեկ բարելն արդեն 33.73 դոլար արժեր:
Երեքշաբթի օրը ՝ սեպտեմբերի 1-ին, Brent մակնիշի նավթի ֆյուչերսները ՝ մատակարարումներով հանդերձ, էժանացել են ավելի քան 8 տոկոսով ու իջել բարելի դիմաց 50 դոլարից էլ ցածր, չնայած երկուշաբթի օրը դրանց գինը աճել էր 10 տոկոսով ու սակարկություններն ավարտվել էին բարելի դիմաց 54.15 դոլարով: Սեպտեմբերի 2-ի Մոսկվայի ժամանակով 1:00-ին այդ մակնիշի նավթի մեկ բարելը վաճառվում էր 48.66 դոլարի սահմանում: WTI մակնիշի նավթը այդ նույն ժամի դրությամբ արժեր մեկ բարելի դիմաց 44.14 դոլար, հայտնում է «ՌԲԿ»-ն: