Քաղաքական գործիչները դժվարություններ ունենալիս հաճախ են տարբեր տակտիկական մանեւրումներ կատարում: Օրինակ՝ հոլիվուդյան մի ֆիլմում ռեժիսորն Ալբանիայի հետ կեղծ պատերազմ է սկսում՝ նախագահի մասնակցությամբ սեքսուալ բնույթի սկանդալից բոլորին շեղելու համար: Կասկածներ կան, որ Թուրքիայի նախագահ Ռեջեփ Թայիփ Էրդողանը նման վտանգավոր սցենար է զարգացնում Թուրքիայում: Այս մասին ասված է «New York Times»-ում հրապարակված հոդվածում:
Հեղինակների խոսքով, Էրդողանն իշխանության համար հուսահատ պայքար է մղում հունիսին կայացած ընտրություններում իր «Արդարություն եւ զարգացում» կուսակցության՝ մեծամասնությունը կորցնելուց հետո: «Անցյալ ամիս՝ նոյեմբերի 1-ի նոր ընտրությունների նախաշեմին, պարոն Էրդողանը վերսկսեց քուրդ անջատականների՝ Քրդական աշխատավորական կուսակցության (ՔԱԿ) դեմ պատերազմը, ակնհայտորեն փորձ անելով ուժեղացնել կառավարության նկատմամբ աջակցությունը եւ այդպիսով փրկել ավտորիտար կառավարումը շարունակելու եւ ավելի լայն իրավասություններ ունենալու իր հավակնությունները»,- ասված է հոդվածում:
Ռազմական գործողությունները վերսկսելու պատրվակ հանդիսացավ երկու թուրք զինվորականի սպանությունը, բայց եթե անգամ նրանց սպանել են ՔԱԿ-ի անդամները, ապա «պարոն Էրդողանը կարող էր արձագանքելու այլ ուղիներ գտնել՝ լայնածավալ պատերազմ սկսելու փոխարեն»:
Հոդվածագիրների կարծիքով, վերսկսելով ռազմական գործողությունները՝ Էրդողանը թուրք ազգայնականներին ուղղված քայլ արեց: «Նրան անհանգստացնում է անջատականների աճող հզորությունը, որոնց ներկայացուցիչները Սիրիայում ԱՄՆ-ի մերձավոր եւ արդյունավետ դաշնակիցներն են դարձել «Իսլամական պետության» դեմ պայքարում»,- գրում են հեղինակները:
Էրդողանը վախենում է, որ ամբողջ տարածաշրջանում՝ Իրանում, Իրաքում, Սիրիայում եւ Թուրքիայում բնակվող քրդերն ավելի համառորեն կսկսեն պայքարել ինքնիշխան պետություն ստեղծելու համար, ինչին այդքան երկար են սպասել:
Հեղինակները հիշեցնում են, որ վերջերս Էրդողանը համաձայնեց Ինջիրլիքի ռազմաբազան տրամադրել ԻԼԻՊ-ի դեմ պայքարի համար եւ միանալ ԱՄՆ-ի գլխավորած կոալիցիային, սակայն նշում են, որ նրա համար գլխավոր առաջնահերթությունը քրդերի դեմ պայքարն է: «Միացյալ Նահանգները պետք է օգտագործի տարածաշրջանում իր ազդեցությունը՝ մարտական գործողությունները դադարեցնելու եւ Էրդողանին ռազմական գործողությունը շարունալու պատրվակից զրկելու համար, որն ավելի է դժվարացնում ԻԼԻՊ-ի դեմ ծանր պայքարը»,- նշված է հոդվածում: