ՌԴ Ռոստովի երկրամասի դատարանը կալանավորել են հայ վարորդ Ռաֆայել Խլղաթյանին մահացու ծեծի ենթարկելու գլխավոր կասկածյալին, հաղորդում է «ՌԻԱ Նովոստին»՝ վկայակոչելով քննչական կոմիտեի ներկայացուցիչ Գալինա Գագալաեւային:
Նա նշել է, թե կասկածյալին կալանավորել են, քննությունը շարունակվում է:
Ավելի վաղ հաղորդվում էր, որ 23-ամյա երիտասարդի նկատմամբ գազանաբար հաշվեհարդար էին տեսել նրա համագյուղացիները։ Ոստիկանության տեղեկություններով՝ անցյալ կիրակի, երբ Սինյավսկոե գյուղում նշում էին գյուղի տոնը, երիտասարդը նստել էր մեքենայի ղեկին, կորցրել ղեկի կառավարումը եւ բախվել կայանված մեքենաներին, ինչի համար նրան դաժան ծեծի էին ենթարկել։
Հարուցվել էր քրեական գործ «Դիտավորյալ կերպով մահացու մարմնական վնասվածք» հասցնելու հոդվածով։ Ձերբակալվել է հաշվեհարդարի մեկ մասնակից։ Հարցաքննության ընթացքում միանգամից մի քանի վկա հայտնել են, որ ճակատագրական հարվածը, որից մահացել է Ռաֆայել Խլղաթյանը, հասցրել է 46-ամյա Անդրեյ Զ.-ն։