Հարևանների կողմից դաժան ծեծի ենթարկվելուց հետո մահացած ազատամարտիկ, 52-ամյա Վարդան Թումանյանի գործով մեղադրվող Գևորգ Սարգսյանը (Ջունգլ), այսօր` սեպտեմբերի 2-ին Ավան և Նոր Նորք վարչական շրջանների առաջին ատյանի ընդհանուր իրավասության դատարանում հայտարարեց, որ ավտովթարի հետեւանքով ստացած վնասվածքների պատճառով վերջին մի քանի դատական նիստերին չի ներկայացել։
Գործով մյուս մեղադրյալ` Գևորգ Սարգսյանը զարմիկ Սարգիս Ղուկասյանն էլ իր հերթին նշեց, որ բացակայել է սննդային թունավորման և նույն ավտովթարի պատճառով:
«Նիտո բան էի կերել, լավ չէի, պարզվեց` թունավորվել եմ: Համ էլ ավարիա տվեցի, դրա համար չեկա»-, նշեց մեղադրյալ Սարգիս Ղուկասյանը:
Մեղադրյալները չմասնավորեցրին, թե ինչ պայմաններում է տեղի ունեցել ավտովթարը։ Նախորդ դատական նիստին մահացածի կինը` Տանյա Մելքումյանը, NEWS.am–ին ասել էր, որ իր տեղեկություններով մեղադրյալները, որոնց նկատմամբ խափանման միջոց է ընտրվել չբացակայելու մասին ստորագրությունը, սահմանն ապօրինաբար խախտելու փորձ են արել, ինչի ժամանակ էլ ավտովթարի են ենթարկվել։
Մեղադրյալների շահերի պաշտպան Կարեն Մկրտչյանը դատական նիստը հետաձգելու միջնորդություն ներկայացրեց, քանի որ իր և մեղադրյալների միջև կնքած պայմանագրի ժամկետը լրացել է, և ինքը չի կարող նրանց շահերը պաշտպանել: Դատարանը չբավարարեց պաշտպանի միջնորդությունը` նշելով, որ այդ հարցը կարելի էր լուծել մինչեւ դատական նիստը։
Հաջորդ դատական նիստը նշանակվեց սեպտեմբերի 22-ին:
Հիշեցնենք, որ առաջին փորձաքննությամբ պարզվել էր, որ Վարդան Թումանյանը մահացել է ծեծի հետեւանքով, մինչդեռ կրկնակի փորձաքննությունը ցույց էր տվել, որ ազատամարտիկի մահվան եւ ծեծի միջեւ պատճառահետեւանքային կապ չկա: Դրանից հետո «Ջունգլի» եւ Սարգիս Ղուկասյանի խափանման միջոցը փոխվել էր, նրանք կալանքից ազատվել էին։
Գործով տուժողի իրավահաջորդի ներկայացուցիչները համաձայն չեն առաջադրված մեղադրանքի հետ:
Ինչպես ավելի վաղ հաղորդել էր NEWS.am-ը, սպանված ազատամարտիկի հարազատների խոսքով՝ 2014թ. հուլիսի 13-ին հարեւանների՝ Վարդան Թումանյանի եւ Բաբկեն Սարգսյանի միջեւ վիճաբանություն էր առաջացել նարդիի խաղի ժամանակ, ավելի ուշ Բաբկեն Սարգսյանի հարազատները՝ Գեւորգ Սարգսյանն ու Սարգիս Ղուկասյանը, եկել էին Վարդան Թումանյանի հետ «զրուցելու», տնից դուրս հրավիրել ու դաժան ծեծի ենթարկել դստեր եւ կնոջ ներկայությամբ։ Մի քանի օր անց Վարդան Թումանյանը հիվանդանոցում մահացել էր։ Վարդան Թումանյանի մահվան առնչությամբ հարուցվել էր քրեական գործ Քրեական օրենսգրքի 112-րդ հոդվածի 2-րդ մասի 6-րդ, 14-րդ կետերով, այն է՝ դիտավորությամբ առողջությանը ծանր վնաս պատճառելը, որը կատարվել է մի խումբ անձանց կամ կազմակերպված խմբի կողմից, եւ անզգուշությամբ առաջացրել տուժողի մահ:
