Հակառակորդն այսօր` սեպտեմբերի 2–ի երեկոյան, կրկին սկսել է ինտենսիվ կրակել Տավուշի մարզի սահմանամերձ գյուղերի ուղղությամբ։ NEWS.am–ի տեղեկություններով` Կոթի գյուղում կրակոցների հետեւանքով կան վիրավորներ։ Նոյեմբերյանի բժշկական կենտրոնից մեզ հետ զրույցում հաստատեցին, որ գյուղից կանչ են ստացել եւ մեքենա են ուղարկել` վիրավորներին հիվանդանոց տեղափոխելու համար, սակայն դեռ պարզ չէ, թե վիրավորները քանիսն են եւ ինչ վիճակում են։
Պաշտպանության նախարարի մամուլի խոսնակ Արծրուն Հովհաննիսյանը NEWS.am–ի հետ զրույցում նշեց, որ ադրբեջանական կողմը կրակում է Տավուշi հատվածում ընդհանուր ճակատի երկայնքով։
«Կրակոցներն այս պահին էլ են ընթանում, կրակում են հիմնականում բոլոր տեսակի հրաձգային զենքերից, իրավիճակը վերահսկելի է»,– ասաց Արծրուն Հովհաննիսյանը։
Նշենք, որ այսօր նախարար Սեյրան Օհանյանը հայտարարել էր, որ սահմանին առկա է լարվածություն, եւ որ հակառակորդը վերջին շրջանում կրակում է հեռահար զենքերից։ Նա նույնպես վստահեցրել էր, որ հայկական ուժերը վերահսկում են իրավիճակը սահմանին։
Հիշեցնենք, որ նախօրեին ադրբեջանական կողմը գնդակոծել էր Չինարի եւ Այգեպար գյուղերը, ինչի հետեւանքով երկու ժամկետային զինծառայող վիրավորվել էր։