Ադրբեջանի գործողությունները բացահայտ ապացուցում են, որ Բաքուն ձգտում է տապալել բանակցային գործընթացը։ Այս մասին NEWS.am-ի թղթակցի հետ զրույցում հայտարարեց Հայաստանի ԱԳՆ մամուլի խոսնակ Տիգրան Բալայանը՝ մեկնաբանելով սահմանամերձ գյուղերի գնդակոծության եւ Կոթիի 2 բնակիչների վիրավորվելու մասին տեղեկությունները։
«Որքան կեղծավոր պետք է լինես, որպեսզի խոսես Միջազգային մարդասիրական իրավունքի մասին եւ նույն օրը ականանետերից կրակես խաղաղ բնակչության վրա։ Այս ամենը եւս մեկ անգամ հաստատում է, որ Ադրբեջանը ձգտում է սրել իրավիճակը եւ դրանով տապալել բանակցային գործընթացը»,- ընդգծել է Տիգրան Բալայանը։
Նշենք, որ վերջին ժամանակներս ադրբեջանական կողմը ակտիվացել է սահմանին եւ ԼՂՀ շփման գծում՝ գործի դնելով խոշոր տրամաչափի հրաձգային սպառազինություն՝ ականանետեր, հրետանային սարքավորումներ։
Նախօրեին Կոթի գյուղի գնդակոծումից իրենց տանը վիրավորվել էին մայր ու որդի։