Էլեկտրաէներգիայի կոմպրոմիսային թանկացումը նույնպես բացասական հետեւանքներ կունենա: Այս մասին սեպտեմբերի 3-ին լրագրողներին հայտնել է Հայաստանի գործատուների միության նախագահ Գագիկ Մաքարյանը:
«Եթե ի վերջո, սպառողների համար էլեկտրաէներգիան թանկանա 6.93 դրամով, ապա բնակչության վճարունակությունը եւ բիզնեսի մրցունակությունը կնվազեն: Եթե թանկանա ասենք 5 դրամով, կկատարվի նույնը, բայց ավելի փոքր ծավալով»,- նկատել է Մաքարյանը:
Հիշեցնենք, որ օգոստոսի 31-ի նիստում Կառավարությունը պաշտոնապես հաստատել է բնակչության համար էլեկտրաէներգիայի սակագների սուբսիդավորումը թանկացման չափով՝ 6.93 դրամ մեկ կիլովատտ ժամի համար: Նման սուբսիդիա կստանա նաեւ բիզնեսը, բայց միայն փոքրը (0.38 կՎ բաժանորդները, ովքեր օգտագործում են ամսական մինչեւ 500 կՎՏ/ ժ, կսուբսիդավորվեն մինչեւ 250 կՎտ .ժ): Իսկ մնացած իրավաբական անձինք պետք է վճարեն նոր սակագնի ամբողջական ծավալը:
Նշենք, որ ցերեկային սակագները 0.38, 6 /10/, 35 ու 110 կՎ բաժանորդների համար թանկացումից հետո կազմել են 48.78, 45.78, 39. 78 եւ 37.28 դրամ կՎտ/ժ ( ընթացիկ փոխարժեքով համապատասխանաբար ՝ 10.1, 9.5, 8.2 եւ 7.7 ցենտ ): 110 կՎ բաժանորդների համար թանկացումը կազմել է 4.43 դրամ, իսկ մնացածի համար 6.93 (վտ/ժ գիշերային սակագներով):