Փաստաբան Նիկոլայ Բաղդասարյանը կարծում է, որ իր դեմ հարուցված քրեական գործը կապված է դերասան Վարդան Պետրոսյանի գործի հետ: Այս մասին NEWS.am-ի հետ զրույցում ասաց փաստաբանը՝ նշելով, որ այդ քրեական գործն իր դեմ հարուցվել է, երբ ինքը ստանձնել է դերասանի պաշտպանությունը:
«Բոլորն էլ իմ բառապաշարը գիտեն, ես երեխայի մասին չեմ օգտագործել «հավի ճուտ» արտահայտությունը, այլ ընդհակառակը, երեխայի պապն էր ասում. «Ուզում ես՝ իմ երեխային հավի ճուտ սարքես, գործը կարճես»: Ես էլ ուղղակի պատասխանել եմ, որ երեխային «հավի ճուտ» սարքելու խնդիր չունեմ, ընդամենը պաշտպանում եմ իմ վստահորդի շահերը: Ու ինքը դրանից հետո սկսեց գոռգոռալ, թե իր երեխային անվանել եմ «հավի ճուտ»: Ամենահետաքրքիրն այն է, որ այս գործը հին գործ է, սակայն հարուցվեց Վարդան Պետրոսյանի պաշտպանությունը ստանձնելուց հետո»,- ասաց փաստաբանը՝ նշելով, որ քրեական գործը խախտումներով է հարուցվել, քանի որ բոլոր ժամկետներն անցել են:
Նշենք, որ գործի հարուցումը մեկ արդեն մերժվել էր քննիչի կողմից, սակայն դատախազը վերացրել էր այդ որոշումը:
Հիշեցնենք, որ Նիկոլայ Բաղդասարյանի դեմ քրեական գործը հարուցվել է Քրեական օրենսգրքի 144-րդ հոդվածով, այն է՝ անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը: