Աղքատության ներկայիս մակարդակի պարագայում տնտեսական աճի մասին ցանկացած խոսակցություն անիրատեսական եւ անտեղի է։ Այս մասին սեպտեմբերի 3-ին լրագրողներին հայտարարեց նախկին պատգամավոր, տնտեսագետ Վարդան Բոստանջյանը։
«Մարդիկ դպրոցական պայուսակ ու տետր գնելու փող չունեն, որպեսզի երեխային դպրոց ուղարկեն։ Իսկ մեզ ասում են՝ տնտեսական աճ։ Ուղղակի ծաղրում են»,- հայտարարեց Բոստանջյանը։
Նրա խոսքով՝ իրավիճակը միայն կվատանա, երբ ի վերջո բարձրանա էլեկտրաէներգիայի սակագինը։ «Ի՞նչ եք կարծում, կգտնվի՞ ինչ-որ մեկը, որը հակառակն է պնդելու»,- հավելեց Բոստանջյանը։
Նշենք, որ ՀՀ Ազգային վիճակագրական ծառայության տեղեկությունների համաձայն՝ 2013թ. աղքատության պաշտոնական մակարդակը (վերջին հասանելի տեղեկությունը) կազմել է 32 տոկոս, ընդ որում ծայրահեղ աղքատության շեմին կանգնած է բնակչության 2.7 տոկոսը։
