Աշխարհում այս պահին կա «օրենքով գողի» կոչումը կրող 485 մարդ, որոնցից 276-ը վրացիներ են, հայտնում է «ՓրայմՔրայմ» ռուսական կայքը։
Վրաստանում գողական աշխարհին պատկանելը քրեորեն պատժելի հանցանք է։ Երկրի օրենսդրությամբ Միխայիլ Սահակաշվիլիի օրոք այդ կետը խստացվել էր։ Սահակաշվիլին փաստացի պատերազմ էր հայտարարել օրենքով գողերին. նրանցից շատերը հայտնվեցին բանտերում, իսկ ոմանք էլ լքեցին երկիրը։
«Թբիլիսիի, Քութաիսի եւ Սուխումի բնակիչների շրջանում «օրենքով գողերն» այնքան շատ էին, որ չափազանցրած չենք լինի, եթե ասենք, որ գրեթե բոլոր վրացի «օրենքով գողերն» այս կամ այն կերպ իրար ազգական են կամ հարեւան»,- ասված է հոդվածում։
«Օրենքով գողերի» քանակով երկրորդ տեղում ռուսներն են՝ 61 մարդ։ Ընդ որում, ռուս գողերից շատերին թագադրել են նրանց վրացի համախոհները։ Առաջատար եռյակը եզրափակում են հայերը, որոնք ապրում են Հայաստանում եւ նրա սահմաններից դուրս իրենց ազդեցությունը չեն տարածում, եզրափակում է կայքը։
