Կարելի է արձանագրել, որ Հայաստանի քաղաքական ուժերի մեծ մասը դրական է գնահատում սահմանադրական բարեփոխումների նախագիծը: Այս մասին սեպտեմբերի 3-ին կայացած ՀՀԿ ԳՄ հերթական նիստից հետո հայտարարեց ՀՀԿ մամուլի խոսնակ, Հայաստանի Ազգային ժողովի փոխնախագահ Էդուարդ Շարմազանովը:
Նրա համոզմամբ, Հայաստանի սահմանադրական բարեփոխումների նախագծով ընդդիմության իրավասություններն անհամեմատ ավելանում են: «Տարիներ շարունակ ընդդիմությունը պահանջում էր անցում կատարել կառավարման խորհրդարանական համակարգի, որպեսզի Հայաստանը մեկ կենտրոնից չղեկավարվի: Երկրորդ, շատերն ասում էին, որ 41 մեծամասնական տեղերը բոնուս են իշխանությունների համար, եւ անհնար է ընդդիմադիր թեկնածուների ընտրվելը: Այսօր մենք լսեցինք նաեւ մեր ընդդիմադիր գործընկերների առաջարկները եւ սահմանադրական բարեփոխումների փաթեթում առաջարկում ենք Հայաստանում համամասնական ընտրակարգ սահմանել»,- նշեց Շարմազանովը: Եվ երրորդ, նրա խոսքով, հիմնական սահմանադրական օրենքներն ընդունվելու են ոչ թե պարզ մեծամասնությամբ, այլ ձայների 3/5-ով:
«Այսինքն՝ կարեւորագույն սահմանադրական օրենքներն անհնար կլինի ընդունել առանց ընդդիմության մասնակցության եւ փոխհամաձայնության ձեռքբերման: Մեր ընդդիմադիր գործիչներն այլեւս չեն կարողանա ասել, որ իշխանությունն իր օրենքներն է հաստատում: Այս Սահմանադրությամբ մենք վերջապես դասական սահմանմամբ ժողովրդավարություն ենք հաստատում»,- ընդգծեց Էդուարդ Շարմազանովը:
Նա նաեւ հավելեց, որ ներկայում Հայաստանի ԱԺ-ի երկու փոխխոսնակներն էլ իշխանության ներկայացուցիչներ են: «Սահմանադրական փոփոխությունների նախագծով, Ազգային Ժողովի 3 փոխնախագահներից 1-ին կարող է առաջադրել ընդդիմությունը: Շատ կարեւոր է, որպեսզի ընդդիմությունից մեր գործընկերներն անմիջականորեն կառավարման համակարգում լինեն եւ ոչ միայն իրավունքներ, այլեւ պարտականություններ ունենան»,- ամփոփեց Շարմազանովը: