Հայ-ադրբեջանական սահմանին սեպտեմբերի 3-ի երեկոյան հակառակորդի գնդակոծությունից վիրավորված քաղաքացիական անձանց վիճակը կայուն է: Այս մասին NEWS.am-ի թղթակցին հայտնեցին Իջեւանի բժշկական կենտրոնից:
Նրանց փոխանցմամբ՝ վիրավորված 3 երիտասարդներն իրենց արդեն լավ են զգում:
«Ոչ մի վտանգ չկա, ամեն ինչ ընտիր ա, նորմալ վիճակում են, կյանքներին վտանգ չի սպառնում»,- ասացին հիվանդանոցից:
Վիրավորված երիտասարդները Վազաշեն համայնքից են: Նրանցից բացի՝ գնդակոծության հետեւանքով վիրավորվել է նաեւ պայմանագրային զինծառայող, որը գտնվում է Բերդի զինվորական հոսպիտալում: Նրա վիճակը նույնպես կայուն է:
Հիշեցնենք, որ սեպտեմբերի 1-ից լարված իրավիճակ է հայ-ադրբեջանական սահմանին: Հակառակորդը պարբերաբար գնդակոծում է սահմանամերձ գյուղերը: Սեպտեմբերի 2-ին էլ վիրավորվել էին Կոթի բնակիչներ, մայր ու որդի, որոնք գտնվում են հիվանդանոց: Նրանց վիճակը նույնպես կայուն է:
