Բանգկոկի քրեական դատարանը ցմահ բանտարկության է դատապարտել Թաիլանդի չորս բնակիչների, ում մեղավոր են ճանաչել մայրաքաղաքի կենտրոնում պայթյուն կազմակերպելու համար, որի հետեւանքով զոհվել է երեք ու վիրավորվել՝ 21 մարդ:
Պայթյունը տեղի էր ունեցել 2014թ. փետրվարի 23-ին «Բիգ Սի» սուպերմարկետի մոտ ՝ Ռաթչադամրի փողոցում ՝ այդ օրերին Բանգկոկի հիմնական խաչմերուկները փակած հակակառավարական ցուցարարների ճամբարից ոչ հեռու: «Մ79» նռնակի պայթյունի հետեւանքով զոհվել է սուպերմարկետի երեք այցելու ՝ մի տարեց կին ու երկու երեխա ՝ հինգ ու վեց տարեկան: Այս հանցագործությունը մեծ արձագանք էր առաջացրել թաիլանդական հասարակությունում: Կասկածյալներին ձերբակալել էին երեք ամիս հետո, հայտնում է «ՏԱՍՍ»-ը:
Ինչպես հայտնում է Bangkok Post թերթը՝ սկզբում մեղադրյալները դատապարտվել էին մահապատժի, սակայն դատարանը փոխել էր պատժամիջոցը ՝ նրանց անկեղծ խոստովանության կապակցությամբ: Ըստ նրանց տված վկայությունների ՝ քաղաքական մոտիվներով ծրագրված հարձակման կազմակերպմանը մասնակցել էր յոթ մարդ, որոնցից երեքը առայսօր որոնման մեջ են:
