Հայաստանի Սահմանադրության նոր նախագիծը կոչված է իշխանությունից ֆոկուսը տեղափոխել քաղաքացիների վրա։ Այս մասին սեպտեմբերի 4-ին խորհրդարանական լսումների ժամանակ հայտարարեց սահմանադրական իրավունքի մասնագետ, Սահմանադրական բարեփոխումների փորձագիտական հանձնաժողովի անդամ Վարդան Պողոսյանը։
«1995թ. Սահմանադրությունը նախատեսում էր, որ նախագահը գերիշխում է իշխանության բոլոր ճյուղերի նկատմամբ։ 2005թ. բարեփոխումները առաջնայնությունը իշխանությունից ամբողջապես չտեղափոխեցին քաղաքացուն։
Ցավոք պետք է խոստովանեմ, որ այս տարիների ընթացքում թե՛ օբյեկտիվ, թե՛ սուբյեկտիվ պատճառներով մենք դեռեւս չենք հասել այն մակարդակին, որ կարողանանք արձանագրել ժողովրդավարության գերիշխանությունը, մարդու իրավունքների հուսալի պաշտպանությունը, կառավարման արդյունավետ համակարգը, դատարանների անկախությունն ու անաչառությունը։ Այդ պատճառով սահմանադրական փոփոխությունների նախագիծը հիմնական նպատակ է սահմանում ժողովրդավարական համակարգն ու իրավունքի գերակայությունը»,- հայտարարեց Պողոսյանը։