Ամերիկյան Միսսուրի նահանգի Սենթ Լուիս քաղաքում 11-ամյա տղան գնդակահարել է 16-ամյա դեռահասի, որը ընկերոջ հետ փորձում էր ներխուժել նրանց տուն: Դեռահասը հրազենային վնասվածք է ստացել է գլխի շրջանում եւ տեղում մահացել, իսկ նրա հանցակցին ոստիկանությունը գտել է ավելի ուշ:
Ոստիկանության փոխանցմամբ, 11-ամյա տղան տանն է եղել իր 4-ամյա քրոջ հետ: նախնական տվյալներով, կասկածյալները երկու անգամ են փորձել ներխուժել այդ տուն: Երրորդ անգամ նրանցից մեկը մտել է տան շքամուտքից, այդ ժամանակ էլ երեխան հանել է ատրճանակն ու գնդակահարել դեռահասին: Իրավապահները սպանվածին գտել են տան շքամուտքի մոտ: Երկրորդ կասկածյալը փախել, բայց բռնվել է: Սպանվածի, կասկածյալի եւ կրակող երեխայի ինքնությունը չի հաղորդվում:
Ընդ որում, որոշ հակասություններ կան ականատեսների եւ երեխաների մոր ցուցմունքներում, մի մասն ասում է, թե դեռահասը տուն չի մտել, այլ վիճել է երեխայի հետ պատշգամբում, ուստի ոստիկանությունը մանրամասն հետաքննում է դեպքի հանգամանքները: պարզում են նաեւ, թե ինչպես է զենքը հայտնվել 11 տարեկան երեխայի ձեռքում: Մայրը հայտարարել է, թե ինքն է գնել հրազենը, քանի որ նախկինում էլ իրենց տունը կողոպտելու փորձեր եղել են: Ոստիկանության ներկայացուցչի խոսքով, մայրն ու որդին համագործակցում են իրավապահների հետ՝ պատմում բոլոր մանրամասները: