ՀՀ իշխանության համար Խորհրդարանում ձայների 3/5-ով մեծամասնություն հավաքելը գործնականում անհնարին է։ Այս մասին սեպտեմբերի 4-ին կայացած խորհրդարանական լսումների ժամանակ հայտարարեց Սահմանադրական բարեփոխումների մասնագիտական հանձնաժողովի անդամ Հրայր Թովմասյանը՝ անդրադառնալով ՀԱԿ պատգամավոր Հրանտ Բագրատյանի հարցին։
«Դուք ասում եք, որ ընդդիմությանն առաջարկում եք որոշում կայացնելու վրա ազդելու հնարավորություն ունենալ՝ կարեւոր հարցերի քվեարկման ժամանակ մեծամասնության շեմ սահմանելով ձայների 3/5-ը։ Իսկ իշխանությունը շատ հանգիստ կվերցնի եւ հավաքի իր համար անհրաժեշտ այդ 3/5-ը ու նորից ինքը կորոշի ամեն ինչ։ Այդ դեպքում ի՞նչ»,- հայտարարեց Բագրատյանը։
Հարցին ի պատասխան՝ Թովմասյանը նշեց, որ գործնականում դա անհնար է։ «Կրկնում եմ, անհնար է։ Չե՞ք հավատում։ Երբ կայանան հաջորդ ընտրությունները, Դուք կարող եք նայել աչքերիս մեջ եւ կրկնել դա»,- հայտարարեց Թովմասյանը։