Ադրբեջանի Օղուզի շրջանում երկրորդ երկրաշարժն է տեղի ունեցել։ Ինչպես գրում է ԱՊԱ կայքը, երկրաշարժը տեղի է ունեցել Շեքի քաղաքից 27 կմ հարավ-արեւելք, տեղական ժամանակով ժամը 14։38-ին։ Օջախը եղել է 20 կմ խորության վրա։ Երկրաշարժը չի զգացվել։

Հիշեցնենք, որ ՀՀ ՏԿԱԻՆ մամուլի ծառայությունից ավելի վաղ հայտնել էին, որ սույն թվականի սեպտեմբերի 4-ին, տեղական ժամանակով ժամը 08.49-ին (Գրինվիչի ժամանակով` 04.49-ին) ՀՀ ՏԿԱԻՆ Սեյսմիկ պաշտպանության ծառայության սեյսմոլոգիական ցանցի կողմից գրանցվել է հյուսիսային լայնության 41.08 աստիճան եւ արեւելյան երկայնության 47.42 աստիճան աշխարհագրական կոորդինատներով (Ադրբեջան), օջախի 30 կմ խորությամբ եւ 5.3 մագնիտուդով երկրաշարժ: Ստորգետնյա ցնցման ուժգնությունը էպիկենտրոնում կազմել է 7-8 բալ:

Երկրաշարժը զգացվել է ՀՀ մի շարք բնակավայրերում` Վանաձորում (2-3 բալ), Ստեփանավանում, Կապանում (3 բալ), Իջեւանում, Նոյեմբերյանում (4 բալ), Չորաթանում (3-4 բալ), Այգեձորում (4-5 բալ) եւ Երեւանում (3-4 բալ), ինչպես նաեւ Արցախում (4 բալ)։