Համաձայն Վրաստանի ՆԳՆ վիճակագրական տվյալների՝ 2015թ. Վրաստանի տարածք մուտք գործած եւ երկրում 24 ժամից ավելի մնացած զբոսաշրջիկների թիվը 2014թ. հետ համեմատ նվազել է 0.7 տոկոսով եւ կազմել 1.57 մլն մարդ։ 2015թ. հունվար-օգոստոս ժամանակահատվածում ընդհանրապես Վրաստան այցելած մարդկանց թիվը կազմել է 3.9 մլն, ինչը 6.1 տոկոսով շատ է անցյալ տարվա ցուցանիշից։ Սակայն իրականում երկրի տնտեսության վրա շոշափելի ազդեցություն են ունենում այն այցելուները, որոնք 24 ժամից ավել են մնում, քանի որ հենց նրանք են օգտվում սպասարկման ոլորտի ծառայություններից։

Այս տարի ամենաշատ զբոսաշրջիկները Վրաստան են մեկնել Հայաստանից՝ 943 հազար մարդ։ Երկրորդ տեղում է Ադրբեջանը՝ 931 հազար այցելու, երրորդ տեղում՝ Թուրքիան՝ 926 հազար այցելու, չորրորդը՝ Ռուսաստանը՝ 642 հազար եւ հինգերորդը՝ Ուկրաինան՝ 94 հազար այցելու, հայտնում է  «Buisness Գրուզիա»-ն։

Նշենք, որ զբոսաշրջությունը Վրաստանի տնտեսության ամենակարեւոր բաղադրիչներից մեկն է։ Նրան բաժին է ընկնում երկրի ՀՆԱ-ի մոտ 7տոկոսը։