Արթուր Ղազարյանի («Քանաքեռցի Տույ») համար մեղադրող Վահե Ասատրյանը 1 տարի 6 ամիս ազատազրկում է պահանջում:
«Գտնում եմ, որ ամբաստանյալին մեղսագրվող արարքի պատիժը մեղմացնող հանգամանքները բացակայում են, պահանջում եմ Արթուր Ղազարյանին մեղավոր ճանաչել ՔՕ 235 հոդվածի 1-ին մասով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: Խափանման միջոցը` կալանավորումը, անփոփոխ թողնել»,- այսօր`սեպտեմբերի 4-ին, Երեւանի Կենտրոն եւ Նորք–Մարաշ վարչական շրջանների դատարանում ասաց մեղադրողը:
Պաշտպանական ճառին պատրաստվելու համար պաշտպանող կողմը դատարանից 10 օր ժամանակ խնդրեց:
Հաջորդ դատական նիստը տեղի կունենա սեպտեմբերի 17-ին:
Արթուր Ղազարյանին մեղադրանք է առաջադրվել այն բանի համար, որ նա գործով չպարզված հանգամանքներում ապօրինի կերպով ձեռք է բերել և կրել հրազեն հանդիսացող «Վիկինգ» մոդելի 9մմ տրամաչափի գործարանային արտադրության ակոսափող ատրճանակ և ռազմամթերք հանդիսացող 9մմ/9X19/ տրամաչափի թվով 17 փամփուշտներ, որոնք նրա մոտ հայտնաբերվել են ՀՀ ոստիկանության Կենտրոնականի բաժնում կատարված անձնական խուզարկության ժամանակ: Արթուր Ղազարյանը քրեական շրջանակներում հայտնի է որպես «Քանաքեռցի Տույ»։