Ադրբեջանի ՊՆ-ն հաշվում է սեփական ագրեսիայի հետեւանքով ունեցած կորուստները։
Ինչպես հայտնում են ադրբեջանական լրատվամիջոցները, վկայակոչելով Ադրբեջանի ՊՆ-ն, զոհվել է 3 ադրբեջանցի զինծառայող՝ Ռաուֆ Վելիեւը, Նեման Ահմեդզադեն եւ Զոհրաբ Մուստաֆազադեն։ Սրանք պաշտոնական տվյալներ են։ Ադրբեջանական մամուլում շրջանառվող ոչ պաշտոնական տեղեկություններով՝ զոհերի թիվն ավելի շատ է։
Նշենք, որ վերջին օրերին ադրբեջանական կողմը պարբերաբար գնդակոծում է Տավուշի մարզի հայկական սահմանամերձ բնակավայրերը: Սեպտեմբերի 24-ին դրա հետեւանքով 3 խաղաղ բնակիչ էր զոհվել:
Ինչպես ավելի վաղ տեղեկացրել էր ԼՂՀ ՊՆ մամուլի ծառայությունը, ս.թ. սեպտեմբերի 25-ին 17:30-ի սահմաններում, ադրբեջանական զինուժի կողմից հրետակոծման է ենթարկվել ԼՂՀ հյուսիս-արեւելյան ուղղությամբ տեղակայված ՊԲ զորամասերից մեկի պահպանության տեղամասը, որի արդյունքում հայկական կողմն ունի զոհեր եւ վիրավորներ: Հրետակոծման ժամանակ հակառակորդն առաջին անգամ կիրառել է 122մմ հրետանային միջոցներ (թուրքական արտադրության հրթիռային կայանք եւ հաուբիցներ)` հարվածներ հասցնելով ոչ թե առաջնագծում տեղակայված դիրքապահ ուժերին, այլ նրանց թիկունքում տեղակայված ստորաբաժանումներին: